1ܒܲܣ ܡܐܵܕܝܼܵܐ ܠܲܝܬ ܓܘܼܢܵܗܟܵܪܘܼܬܵܐ ܠܐܵܢܝܼ ܕܝܼܢܵܐ ܒܝܼܫܘܿܥ ܡܫܝܼܚܵܐ. 2ܣܵܒܵܒ ܢܵܡܘܿܣܵܐ ܕܪܘܼܚܵܐ ܕܚܲܝܹ̈ܐ ܕܒܝܼܫܘܿܥ ܡܫܝܼܚܵܐ ܥܒܼܝܼܕܸܢܹܗ ܐܵܙܵܕ ܡ̣ܢ ܢܵܡܘܿܣܵܐ ܕܚܛܝܼܬܵܐ ܘܕܡܵܘܬܵܐ. 3ܒܠܵܐ ܡܨܵܝܬܵܐ ܕܢܵܡܘܿܣܵܐ؛ ܒܗ̇ܝ ܕܙܲܒܘܼܢ ܝܼܗَܘܵܐ ܒܝܲܕ ܒܸܣܪܵܐ؛ ܫܘܼܕܸܪܹܗ ܐܲܠܵܗܵܐ ܠܒܪܘܼܢܵܐ ܕܓܵܢܹܗ ܒܕܡܘܼܬܵܐ ܕܒܸܣܪܵܐ ܕܚܛܝܼܬܵܐ؛ ܘܣܵܒܵܒ ܕܚܛܝܼܬܵܐ؛ ܥܒܼܸܕܠܹܗ ܓܘܼܢܵܗܟܵܪ ܠܚܛܝܼܬܵܐ ܒܒܸܣܪܵܐ؛ 4ܕܦܵܩܲܕܬܵܐ ܕܢܵܡܘܿܣܵܐ ܒܝܲܢ ܦܵܝܫܵܐ ܗَܘܵܐ ܬܘܼܡܸܡܬܵܐ؛ ܕܠܹܐ ܝܘܵܚ ܒܸܚܕܵܪܵܐ ܒܒܸܣܪܵܐ؛ ܐܸܠܵܐ ܒܪܘܼܚܵܐ. 5ܣܵܒܵܒ ܐܵܢܝܼ ܕܒܒܸܣܪܵܐ ܝܢܵܐ؛ ܡܸܢܕܝܼ ܕܒܸܣܪܵܐ ܟܹܐ ܚܵܫܒܼܝܼ؛ ܘܐܵܢܝܼ ܕܒܪܘܼܚܵܐ ܝܢܵܐ؛ ܡܸܢܕܝܼ ܕܪܘܼܚܵܐ. 6ܣܵܒܵܒ ܚܝܼܵܠ ܕܒܼܣܪܵܐ ܡܵܘܬܵܐ ܝܠܹܗ؛ ܘܚܝܼܵܠ ܕܪܘܼܚܵܐ ܚܲܝܹ̈ܐ ܘܫܠܵܡܵܐ. 7ܣܵܒܵܒ ܚܝܼܵܠ ܕܒܸܣܪܵܐ ܕܸܫܡܸܢܵܝܘܼܬܵܐ ܝܠܹܗ ܥܲܠ ܐܲܠܵܗܵܐ؛ ܣܵܒܵܒ ܠܹܐ ܝܠܹܗ ܙܲܒܛ ܠܢܵܡܘܿܣܵܐ ܕܐܲܠܵܗܵܐ؛ ܣܵܒܵܒ ܠܹܐ ܡܵܨܹܐ. 8ܘܐܵܢܝܼ ܕܒܸܣܪܵܐ ܝܢܵܐ؛ ܠܹܐ ܡܵܨܝܼ ܠܸܫܦܵܪܵܐ ܠܐܲܠܵܗܵܐ. 9ܐܝܼܢܵܐ ܐܲܚܬܘܿܢ ܠܹܐ ܝܬܘܿܢ ܒܒܸܣܪܵܐ؛ ܐܸܠܵܐ ܒܪܘܼܚܵܐ؛ ܐܸܢ ܐَܢܵܫܵܐ ܠܲܝܬ ܒܝܹܗ ܪܘܼܚܹܗ ܕܡܫܝܼܚܵܐ؛ ܐܵܗܵܐ ܠܹܐ ܝܠܹܗ ܕܝܹܗ. 10ܘܐܸܢ ܡܫܝܼܚܵܐ ܒܝܼܵܘܟܼܘܿܢ ܝܼܠܹܗ؛ ܦܲܓܼܪܵܐ ܡܝܼܬܵܐ ܝܠܹܗ ܣܵܒܵܒ ܕܚܛܝܼܬܵܐ؛ ܐܝܼܢܵܐ ܪܘܼܚܵܐ ܚܵܝܬܵܐ ܝَܠܵܗ̇ ܣܵܒܵܒ ܕܙܲܕܝܼܩܘܼܬܵܐ. 11ܘܐܸܢ ܪܘܼܚܹܗ ܕܗ̇ܘ ܕܡܘܼܩܸܡܠܹܗ ܠܡܫܝܼܚܵܐ ܡ̣ܢ ܡܝܼܬܹ̈ܐ؛ ܐܘܼܦ ܠܦܲܓܼܪ̈ܘܿܟܼܘܿܢ ܡܝܼܬܹ̈ܐ ܒܸܬ ܡܲܚܹܐ؛ ܣܵܒܵܒ ܕܪܘܼܚܹܗ ܕܒܸܥܡܵܪܵܐ ܝَܠܵܗ̇ ܒܝܼܵܘܟܼܘܿܢ. 12ܒܲܣ؛ ܐܵܚܘܿܢܘܵܬܝܼ̈؛ ܕܵܝܢܵܢܹ̈ܐ ܝܘܵܚ؛ ܠܵܐ ܠܒܸܣܪܵܐ ܕܒܒܸܣܪܵܐ ܚܲܝܵܚ؛ 13ܣܵܒܵܒ ܐܸܢ ܒܒܸܣܪܵܐ ܒܸܚܵܝܵܐ ܝܬܘܿܢ؛ ܗܕܝܼܪܹܐ ܝܬܘܿܢ ܠܸܡܝܵܬܵܐ؛ ܐܝܼܢܵܐ ܐܸܢ ܒܪܘܼܚܵܐ ܦܘܼܠܚܵܢܹ̈ܐ ܕܦܲܓܼܪܵܐ ܡܲܡܝܘܼܬܹܐ ܝܬܘܿܢ؛ ܒܸܬ ܚܵܝܝܼܬܘܿܢ. 14ܣܵܒܵܒ ܟܠܵܝܗܝ ܕܒܪܘܼܚܵܐ ܕܐܲܠܵܗܵܐ ܦܵܝܫܝܼ ܬܘܼܓܒܸܪܹܐ؛ ܐܲܢܹܐ ܒܢܘܼܢܹ̈ܐ ܕܐܲܠܵܗܵܐ ܝܢܵܐ. 15ܣܵܒܵܒ ܠܵܐ ܩܘܼܒܸܠܵܘܟܼܘܿܢ ܪܘܼܚܵܐ ܕܩܘܼܠܘܼܬܵܐ ܡܸܢَܕܪܸܫَ ܠܙܕܘܼܥܬܵܐ؛ ܐܸܠܵܐ ܩܘܼܒܸܠܵܘܟܼܘܿܢ ܪܘܼܚܵܐ ܕܥܒܼܵܕܬܵܐ ܕܒܢܘܼܢܹ̈ܐ؛ ܕܒܝܼܵܗܿ ܒܸܩܪܵܝܵܐ ܝܘܵܚ؛ ܐܲܒܵܐ؛ ܒܵܒܲܢ. 16ܘܗ̇ܘ ܪܘܼܚܵܐ ܒܝܼܵܗَܒܼܵܐ ܝܠܹܗ ܣܵܗܕܘܼܬܵܐ ܠܪܘܼܚܲܢ؛ ܕܒܢܘܼܢܹܗ ܕܐܲܠܵܗܵܐ ܝܘܵܚ؛ 17ܘܐܸܢ ܒܢܘܼܢܹ̈ܐ؛ ܐܘܼܦ ܝܵܪܬܘܿܬܹܐ؛ ܝܵܪܘܿܬܹܗ ܕܐܲܠܵܗܵܐ؛ ܘܚܲܒܼܪܵܘܵܬܹܐ ܒܝܵܪܬܘܼܬܵܐ ܥܲܡ ܡܫܝܼܚܵܐ؛ ܐܸܢ ܗܲܪ ܩܵܒܠܵܚ ܚܲܫܵܐ ܥܲܡܹܗ ܕܐܘܼܦ ܥܲܡܹܗ ܦܵܝܫܵܚ ܚܩܝܼܪܹܐ. 18ܣܵܒܵܒ ܒܸܚܫܵܒܼܵܐ ܝܘܸܢ ܕܠܹܐ ܛܵܒܼܝܼ (ܚܫܝܼܚܹܐ ܕܡܲܕܒܼܸܩܝܼ) ܚܲܫܹ̈ܐ ܕܐܵܗܵܐ ܙܲܒܼܢܵܐ ܥܲܡ ܬܸܫܒܘܿܚܬܵܐ ܕܒܸܬ ܦܵܝܫܵܐ ܓܠܝܼܬܵܐ ܒܝܲܢ. 19ܣܵܒܵܒ ܕܣܦܵܪܬܵܐ ܩܘܼܝܼܬܵܐ ܕܒܪܝܼܬܵܐ ܒܸܣܦܵܪܵܐ ܝَܠܵܗ̇ ܠܓܸܠܝܵܢܵܐ ܕܒܢܘܼܢܹ̈ܐ ܕܐܲܠܵܗܵܐ. 20ܣܵܒܵܒ ܒܪܝܼܬܵܐ ܦܸܫܠܵܗ̇ ܙܲܒܛ ܠܣܪܝܼܩܘܼܬܵܐ؛ ܠܵܐ ܒܪܸܙܵܝܘܼܗܿ؛ ܐܸܠܵܐ ܣܵܒܵܒ ܕܗ̇ܘ ܕܙܘܼܒܛܸܢܵܠܹܗ؛ 21ܒܗܹܒܼܝܼ ܕܐܘܼܦ ܒܪܝܼܬܵܐ ܒܓܵܢܘܼܗܿ ܦܵܝܫܵܐ ܥܒܼܝܼܕܬܵܐ ܐܵܙܵܕ ܡ̣ܢ ܩܘܼܠܘܼܬܵܐ ܕܚܪܵܒܼܵܐ ܠܐܵܙܵܕܘܼܬܵܐ ܕܬܸܫܒܘܿܚܬܵܐ ܕܒܢܘܼܢܹ̈ܐ ܕܐܲܠܵܗܵܐ. 22ܣܵܒܵܒ ܒܝܼܕܲܥܝܵܐ ܝܘܵܚ ܕܟܠܵܗܿ ܒܪܝܼܬܵܐ ܟܹܐ ܬܵܢܚܵܐ ܘܟܹܐ ܕܵܒܼܩܵܐ ܚܸܒܼܠܹ̈ܐ ܗܲܠ ܐܵܕܝܼܵܐ. 23ܘܠܵܐ ܗܲܪ ܐܵܢܝܼ؛ ܐܸܠܵܐ ܐܘܼܦ ܐܲܚܢܲܢ ܕܐܝܼܬ ܒܝܲܢ ܢܘܼܒܲܪܠܸܓܼ ܕܪܘܼܚܵܐ؛ ܐܘܼܦ ܐܲܚܢܲܢ ܬܵܢܘܿܚܸܐ ܝܘܵܚ ܒܓܵܢܲܢ؛ ܘܒܸܣܦܵܪܵܐ ܝܘܵܚ ܠܥܒܼܵܪܬܵܐ ܕܒܢܘܼܢܸ̈ܐ؛ ܠܦܘܼܪܩܵܢܵܐ ܕܦܲܓܼܪܼܵܢ. 24ܣܵܒܵܒ ܒܗܹܒܼܝܼ ܦܸܫܠܲܢ ܦܘܼܪܩܹܐ. ܐܝܼܢܵܐ ܗܹܒܼܝܼ ܕܦܵܝܫܵܐ ܚܙܝܼܬܵܐ ܠܸܐ ܝَܠܵܗ̇ ܗܹܒܼܝܼ؛ ܣܵܒܵܒ ܡܸܢܕܝܼ ܕܐَܢܵܫܵܐ ܚܵܙܸܐ؛ ܩܵܡܘܕܝܼ ܣܵܦܸܪ ܐܸܠܸܗ؛ 25ܐܝܼܢܵܐ ܐܸܢ ܠܡܸܢܕܝܼ ܕܠܹܐ ܝܘܵܚ ܒܸܚܙܵܝܵܐ ܒܗܹܒܼܝܼ ܝܘܵܚ؛ ܒܚܡܵܠܬܵܐ ܟܹܐ ܣܵܦܪܲܚ ܐܸܠܸܗ. 26ܗܲܕܟܼܵܐ ܐܘܼܦ ܪܘܼܚܵܐ ܟܹܐ ܗܲܝܸܪ ܠܙܲܒܘܼܢܘܼܬܲܢ؛ ܣܵܒܵܒ ܡܘܼܕܝܼ ܨܵܠܵܚ؛ ܕܵܐܟܼܝܼ ܕܝܼܠܵܗ̇ ܘܵܓ̰ܸܒ؛ ܠܹܐ ܝܘܵܚ ܒܝܼܕܲܥܝܵܐ؛ ܐܸܠܵܐ ܪܘܼܚܵܐ ܒܓܵܢܹܗ ܟܹܐ ܦܲܪܦܸܠ ܡܒܵܕܵܠܲܢ ܒܬܵܢܲܚܝܵܬܹ̈ܐ ܕܠܹܐ ܐܵܬܝܼ ܠܗܲܡܙܘܼܡܹܐ. 27ܘܗ̇ܘ ܕܟܹܐ ܨܲܚܨܹܐ ܠܸܒܵܘܵܬܹ̈ܐ؛ ܗ̇ܘ ܟܹܐ ܝܲܕܸܥ ܡܘܼܕܝܼ ܝܠܹܗ ܚܝܼܵܠ ܕܪܘܼܚܵܐ؛ ܕܐܲܝܟܼ ܪܸܙܵܝܹܗ ܕܐܲܠܵܗܵܐ ܟܹܐ ܦܲܪܦܸܠ ܡܒܵܕܵܠ ܕܩܲܕܝܼܫܹ̈ܐ. 28ܐܝܼܢܵܐ ܒܝܼܕܲܥܝܵܐ ܝܘܵܚ؛ ܕܠܐܵܢܝܼ ܕܡܲܚܸܒܝܼ ܠܐܲܠܵܗܵܐ؛ ܟܠܵܝܗܝ ܡܸܢܕܝܼܵܢܹ̈ܐ ܟܹܐ ܦܵܠܚܝܼ ܥܲܡܵܝܗܝ ܠܛܵܒܼܬܵܐ؛ ܠܐܵܢܝܼ ܕܩܵܕَܡܵܝܬܵܐ ܡܘܼܬܸܒܼܠܹܗ ܕܗܵܘܝܼ ܩܸܪ̈ܝܹܐ. 29ܣܵܒܵܒ ܐܵܢܝܼ ܕܡ̣ܢ ܩܵܕَܡܵܝܬܵܐ ܝܕܸܥܝܵܝܠܹܗ؛ ܪܫܝܼܡܵܝܠܹܗ ܒܕܡܘܼܬܵܐ ܕܨܘܼܪܬܵܐ ܕܒܪܘܼܢܸܗ؛ ܕܗ̇ܘ ܗܵܘܹܐ ܒܘܼܟܼܪܵܐ ܓܵܘ ܪܵܒܵܐ ܐܵܚܘܿܢܘܵܬܹ̈ܐ. 30ܐܝܼܢܵܐ ܠܐܵܢܝܼ ܕܩܵܕَܡܵܝܬܵܐ ܪܫܝܼܡܵܝܠܹܗ؛ ܩܪܹܐܠܹܗ؛ ܘܠܐܵܢܝܼ ܕܩܪܹܐܠܹܗ؛ ܡܘܼܟܫܸܛܵܝܠܹܗ؛ ܘܠܐܵܢܝܼ ܕܡܘܼܟܫܸܛܠܹܗ ܚܩܝܼܪܵܝܠܹܗ. 31ܒܲܣ ܡܘܼܕܝܼ ܐܵܡܪܵܚ ܥܲܠ ܕܐܲܢܹܐ ܡܸܢܕܝܼܵܢܹ̈ܐ؛ ܐܸܢ ܐܲܠܵܗܵܐ ܠܵܓܹܒܲܢ ܝܼܠܹܗ؛ ܡܵܢܝܼ ܝܠܹܗ ܠܕܲܪܩܘܼܒܼܠܲܢ؛ 32ܗ̇ܘ ܕܠܒܪܘܼܢܵܐ ܕܓܵܢܹܗ ܠܵܐ ܚܣܸܟܼܠܹܗ؛ ܐܸܠܵܐ ܡ̣ܢ ܓܹܒܵܐ ܕܟܠܲܢ ܣܘܼܦܹܠܹܗ؛ ܕܵܐܟܼܝܼ ܥܲܡܹܗ ܠܹܐ ܝܵܗَܒܸܠ ܠܲܢ ܟܠ ܡܸܢܕܝܼ؛ 33ܡܵܢܝܼ ܒܸܬ ܕܵܒܼܸܩ ܓܢܵܗܵܐ ܥܲܠ ܓܘܼܒܝܹ̈ܐ ܕܐܲܠܵܗܵܐ؛ ܐܲܠܵܗܵܐ ܟܹܐ ܡܲܟܫܸܛ. 34ܡܵܢܝܼ ܒܸܥܒܼܵܕܵܐ ܝܠܹܗ ܓܘܼܢܵܗܟܵܪ؛ ܡܫܝܼܚܵܐ ܡܝܼܬܠܹܗ؛ ܘܒܘܼܫ ܙܵܘܕܵܐ ܩܝܼܡܵܐ ܝܠܹܗ ܘܥܲܠ ܝܲܡܝܼܢܵܐ ܕܐܲܠܵܗܵܐ ܝܠܹܗ؛ ܘܦܲܪܦܘܼܠܹܐ ܝܠܹܗ ܡܒܵܕܵܠܲܢ. 35ܡܵܢܝܼ ܒܸܬ ܦܵܪܸܫ ܠܲܢ ܡ̣ܢ ܚܘܼܒܹܗ ܕܡܫܝܼܚܵܐ؛ ܐܘܼܠܨܵܢܵܐ؛ ܝܲܢ ܚܒܼܘܼܫܝܵܐ؛ ܝܲܢ ܛܪܵܕܬܵܐ؛ ܝܲܢ ܟܸܦܢܵܐ؛ ܝܲܢ ܫܘܼܠܚܵܝܘܼܬܵܐ؛ ܝܲܢ ܩܸܘܲܢܕܝܼܢܘܿܣ؛ ܝܲܢ ܣܲܝܦܵܐ؛ 36ܐܲܝܟܼ ܕܝܼܠܹܗ ܟܬܝܼܒܼܵܐ؛ ܒܚܵܬܸܪ ܕܝܼܘܼܟܼ ܟܠ ܝܘܿܡ ܦܵܝܫܵܐ ܝܘܵܚ. ܩܛܝܼܠܹܐ؛ ܘܦܸܫܠܲܢ ܚܘܼܫܒܸܢܹܐ ܐܲܝܟܼ ܦܸܪܹ̈ܐ ܠܦܪܵܡܬܵܐ. 37ܐܸܠܵܐ ܒܐܲܢܹܐ ܟܠܵܝܗܝ ܙܵܘܕܵܐ ܡ̣ܢ ܠܵܠܒܵܢܹ̈ܐ ܝܘܵܚ؛ ܒܝܲܕ ܕܗ̇ܘ ܘܡܘܼܚܸܒܵܠܹܗ. 28ܣܵܒܵܒ ܗܲܡܘܼܢܹܐ ܝܘܸܢ؛ ܕܠܵܐ ܡܵܘܬܵܐ؛ ܘܠܵܐ ܚܲܝܹ̈ܐ ܘܠܵܐ ܡܲܠܲܐܟܹ̈ܐ ܘܠܵܐ ܗܘܼܟܡܹ̈ܐ؛ ܘܠܵܐ ܚܲܝ̈ܠܹܐ؛ ܘܠܵܐ ܡܸܢܕܝܼܵܢܹ̈ܐ ܕܝܼܢܵܐ؛ ܘܠܵܐ ܕܒܸܬ ܗܵܘܝܼ؛ 39ܘܠܵܐ ܪܵܘܡܵܐ؛ ܘܠܵܐ ܥܘܼܡܩܵܐ؛ ܘܐܘܼܦ ܠܵܐ ܒܪܝܼܬܵܐ ܐܚܹܪَܬܵܐ؛ ܡܵܨܝܵܐ ܕܦܵܪܫܵܐ ܠܲܢ ܡ̣ܢ ܚܘܼܒܹܗ ܕܐܲܠܵܗܵܐ ܕܒܡܵܪܲܢ ܝܼܫܘܿܥ ܡܫܝܼܚܵܐ.